Жүк жеткізілімінде жылдамдық маңызды

Сулугуль Бакесова

Сулугуль Бакесова

«Қазақстан темір жолы» ұлттық компаниясы биылғы бірінші жартыжылдықты коронавирус пандемиясының ылаңына және әлемде қалыптасып отырған экономикалық күрделі жағдайға қарамастан толайым табыстармен тәмамдады. Оның жарқын көрінісін, транзиттік контейнерлік жүк тасымалы көлемінің еселеп артуынан көреміз. Мәселен, алты айда еліміз арқылы 105 мың ЖФЭ тасымалданған.

Нақтысында бастапқыда 60 мың ЖФБ жоспарланған болатын. Сөзіміз дәйекті болу үшін, өткен жылдың есепті мерзіміндегі транзиттік тасымал көлемін алып қарайтын болсақ, былтыр 51 мыңнан астам жиырмафуттық эквивалентті контейнер тасымалданған.

Осылайша, биыл екі тоқсанда Қазақстан арқылы теміржол көлігімен контейнерлер тасымалы көлемінің 54% артқанын көреміз. Осы ретте, биыл транзиттік контейнер ағымының өсуіне Беларусь және Ресей мемлекеттері арқылы өтетін «Солтүстік дәліздің» де оң ықпал еткенін айтып отыр Ұлттық компанияның логистик мамандары. Үстіміздегі жылдың бірінші жартыжылдығында ҚТЖ инфрақұрылымы арқылы жалпы транзит көлемі 35% артып, 10,2 млн тоннаны құраған.

Соның ішінде вагон бойынша жөнелтілім 32%, контейнерлік тасымал 54% өскені байқалады. Осы ретте, мамандар биыл ақпан айында көрші елде қытайлық өнеркәсіптің тоқтап тұруына байланысты контейнер транзиті бірталай құлдырап кеткенін, алайда, сәуір, мамыр және маусым айларында тасымал көлемі айына 100 мың ЖФБ-ні құрап, межелі жоспардан анағұрлым асып түскенін айтып отыр.

Нәтижесінде, Қытай – Еуропа – Қытай бағдары бойынша транзит көлемі 91% артты. «Қазақстан темір жолы» ұлттық компаниясы қазіргі көтеріңкі көрсеткіштерді сақтап қалу жолында тиімді жұмыстарын жалғастыруды көздеп отыр.

Атап айтқанда, олар Қазақстан аумағы арқылы жоғары қозғалыс жылдамдығын сақтап қалу, әкімшілік кедергілерді төмендету және инфрақұрылымды одан ары қарай жаңғыртып, жетілдіру. Осы арада, шекаралық Достық станциясында контейнерлерді өңдеуге арналған екі қосымша терминал салу жоспарланып отырғанын айтар едік.

«Қазақстан – Азия мен Еуропа арасындағы құрлықтағы сауда үшін көліктік және логистикалық орталық. Бұл ретте жүктерді жеткізу жылдамдығының артуы – құрлықтағы маршруттың теңіз бағыты алдындағы бәсекелестіктегі басты артықшылығы болып табылады.

Елімізде транзиттік тасымалдарға ерекше мән беріледі, өйткені, ол жүк айналымында тек 13%-ды құраса да, табыстың 30%-ын әкеліп отыр», – дейді «ҚТЖ» ҰК» АҚ басқарма төрағасының логистика жөніндегі орынбасары Павел Соколов.

Оның айтуынша, Қазақстан аумағы арқылы өтетін халықаралық көлік дәліздерінің даму перспективалары да зор. Олай дейтініміз, бұл бағыттар бойынша жүктерді жеткізудің орташа жылдамдығы бүгінде 13-16 күнді құрайды, ал он жыл бұрын шамамен 40 күн болатын.

«Бұл – технологиялық процестерді оңтайландыру, жеткізу мерзімін қысқарту бойынша күнделікті бірлескен жұмыстың нәтижесі», – дейді білікті маман.

Сала мамандары да 2030 жылы Қытай мен Еуропа арасындағы әрбір оныншы контейнер темір жолмен тасымалдануы мүмкін екенін айтады. Бұған көп жағдайда тасымалдау уақытының қысқаруы ықпал етпек. Мысалы, Достық станциясынан Беларусьтің Брест қаласына дейінгі ұзындығы 5300 шақырымнан асатын маршрут жолы бүгінде 4,9 күнді құрап отыр. Демек, жүк Қытайдан Еуропаға 11 күн шамасындай аз уақыт ішінде тасымалдануда.