Өндірісті өңірдің табысты тұрақты

Ардақ Ерубаева

Ардақ Ерубаева

Ақтөбе жүк тасымалы бөлімшесі жылдың алғашқы жартысын табысты аяқтады. Елде жарияланған төтенше жағдай, әлемде тараған індет қаупіне қарамастан өндірісті өңірде жүк айналымы мен жүк тиеу көрсеткіштері межеге жетті.

Ақтөбе өңірі мұнай мен газға және хром, никель, титан, фосфор, мырыш, мыс, алюминий секілді кен ресурстарына бай. Облыстағы «Ақтөбе рельсарқалық зауыты», «СНПСАқтөбемұнайгаз» АҚ, «Қазхром» АҚ құрамындағы «Ақтөбе ферроқорытпа зауыты», «Дөң таукен байыту комбинаты», «Ақтөбе хром қосындылары зауыты» және «Ақтөберентген» АҚ сияқты алпауыт компаниялардың өнімі теміржол қатынасы арқылы алыс шетелдерге шығарылады.

Сапалы өнімге сұраныс жоғары. Сонымен қатар өңірде құрылыс, металлургия, химия, ауылшаруашылық саласы да жақсы дамыған. Жоғары сұранысқа ие өнімнің барлығы шетелге Ақтөбе ЖТ бөлімшесі арқылы тасымалданып отыр. Нәтижесінде экономикалық даму тұрақты, жүк тасымалындағы табыс көлемі де жүз пайызға жетті. Атап айтқанда, эксплуатациялық тауар айналымы 6,1 пайызға артқан. Алты айдағы айналым көлемі 10 млрд 146,9 млн тонна-км құрайды.

Өткен жылдың сәйкес кезеңімен салыстырғанда 5 пайызға, яғни 483,5 млн тонна-км артық. Бөлімшеде жыл басынан бері 9 млн 669 мың тонна жүк жөнелтілген. Негізгі номенклатуралық жүктер бойынша өсім байқалады. Соның ішінде құрылыс материалдары 266,4 мың тонна, қара металл сынықтары 3,1 мың тонна және ұн өнімдері 34,1 мың тонна тиелген.

Нәтижесінде жүк тиеу жоспары 424,7 мың тоннаға немесе 4,6 пайызға артық орындалып тұр. Ақтөбе жүк тасымалдау бөлімшесінің техникалық бөлім басшысы Жасұлан Рсқалиев жүк тасымалы қызметіндегі қол жеткен табыстарды баяндап берді.

«Ақтөбе ЖТ бөлімшесі Жайсаң станциясы арқылы Орал, Әйтеке би станциясы арқылы Қостанай, Сағыз станциясы арқылы Атырау, Сексеуіл станциясы арқылы Қызылорда, Тассай станциясы арқылы Маңғыстау бөлімшелерімен және Әлімбет станциясы арқылы Оңтүстік Орал теміржолымен жалғасып жатыр. Жүк тасымалы ел ішінде ғана емес, сыртқы байланыста да тоқтаған жоқ. Тасымал көлемі тұрақты», – дейді Жасұлан Рсқалиев.

Техникалық бөлім басшысының мәліметінше, алты айдағы вагон айналымы 94,5% құраған. Вагондар айналымының баяулауы жұмыс істеп тұрған вагон паркінің тәулігіне 495 вагонға артуымен байланысты. Ал вагондардың орташа тәуліктік жүрісі 20,5 км қысқарды. Алты айдағы жүк пойызының орташа салмағы 3168 тонна брутто болған. Ақтөбе және Орал өңірлері бойынша алты айдағы дизель отынының үнемделуі 724.407 тоннаны құраған.

Арнайы жүйе арқылы жанармай шығынын бақылау, энергияны оңтайлы жұмсау қамтамасыз етіледі. Бұл отын-энергетика ресурсының шығынсыз болуына тиімді. Жүк пойыздарының техникалық жылдамдығы 99,8 пайызға орындалды. Жылдамдықты шектеу туралы ескертулердің көбеюі шпалдардың ескіріп, шіруінен туындаған. Белгіленген жылдамдық пен жолдың нақты жағдайы арасындағы сәйкессіздікке байланысты шығарылған 2107 ескерту биыл жоспарлы түрде қалыпқа келтірілді. Локомотивтің орташа тәуліктік өнімділігі 37 мың тонна-км бруттоға азайып, 97,8% құрады.

Сонымен қатар, өткен 6 айда бөлімшеге қарасты телімдермен 1129 жеңіл салмақты пойыздар өткен, оның ішінде орташа салмағы 1448 тонна болатын 716 контейнерлік пойыз бар.

«Елдегі қиын жағдайға қарамастан Ақтөбе ЖТ бөлімшесі негізгі өндірістік көрсеткішті толық орындап шықты. Жүк айналымы, тиеу, жөнелту жұмыстарының көрсеткіші жоғары. Бүгінде Орта Азия аймағының экономикалық ынтымақтастығы дәлізін жалғастыратын «Ақтөбе-Атырау-Астрахань» тас жолын жаңғырту жұмыстарына құрылыс материалдарын тасып жатырмыз. «Нұрлы жол» бағдарламасы аясында атқарылып жатқан осы жұмысты қамтамасыз ету бойынша Жіңішке, Ақтөбе, Шұбарқұдық, Қарауылкелді, Ноғайты станцияларында жүк көлемі артты», – дейді Рсқалиев.