Жыл жетістігі - жоғары көрсеткіш

Сулугуль Бакесова

Сулугуль Бакесова

Ақмола жүк тасымалы бөлімшесінің директоры Айнабек Жұқашевтің төрағалығымен өткен аппараттық кеңесте санаулы күннен соң тарих қойнауына табыстағалы отырған биылғы жылдың болжамды пайдалану көрсеткіштерінің қорытындысы шығарылды.

– Ағымдағы жыл еліміз үшін ауыр жыл болды. Десек те, Ақмола жүк тасымалы бөлімшесінің ұжымы мемлекет басшылығы жариялаған карантин жағдайында жұмыс істеу барысында тәртіп пен жауапкершіліктің үлгісін көрсетіп, коронавирус инфекциясының таралмауына барын салды. Бұл мәселеге Ұлттық компанияда айрықша мән бергенін білесіздер. 

Біздің бөлімшенің шекарасы Ресей темір жолдарына қарасты Оңтүстік Орал теміржолымен түйісетін болғандықтан, Көкшетау депосының локомотив бригадалары Петропавловск демалыс үйіне барып тынығып алар болса, РТЖ-на қарасты Қорған депосының локомотив бригадалары біздің аумақтағы Пресногорьковск станциясына тоқтайды. Бұдан бөлек Ақмола бөлімшесі шекарасымен жанасатын өзге де түйіспе жолдардың, Қостанай, Қарағанды, Павлодар ЖТ бөлімшелерінің локомотив бригадалары біздің аумақта кіріп-шығып жатады, алайда, бірлесе әзірлеген ұйымдастырушылық-техникалық шаралардың нәтижесінде вирустық инфекцияның таралуына жол берілмеді, – деді өз сөзінде Айнабек Жұқашев. 

Бөлімше басшысы межелі мерзімде НұрСұлтан-Атбасар телімінде жоспарланған күрделі жөндеу жұмыстары жүргізіліп біткенін, ал бұл өз кезегінде ҚытайБатыс Еуропа бағыты бойынша контейнерлік тасымалдардың бағдарлық жылдамдығын орындауға қатысты алға қойған міндеттердің іске асуына мүмкіндік беретінін атап өтті. 

– Контейнерлік тасымалдың бағдарлық жылдамдығын арттыру – Компания басшылығының магистральдық желі жұмысшыларының алдына қойып отырған маңызды міндеті. Бүгінде бұл міндетті ақмолалық теміржолшылар абыроймен атқарып келеді. Келер жылы да біз осы үрдісімізден жаңылмай, жұмыс істейтін боламыз деп сенемін, – деді ол.

Күн тәртібінде қаралған келесі бір мәселе, пайдалану көрсеткіштерінің орын далуы болды. Атап өтерлігі, пайдалану көрсеткіші жай ғана орындалып қана қоймай, өткен жылмен салыстырғанда жақсара түскен. Әсіресе, жүк айналымы сияқты қор құраушы көрсеткіштің жақсаруы – шынында, үлкен жетістік. 

Мәселен, жүк айналымының жоспарлы көрсеткішінің 102% аса орындалуы, өткен жылдың есепті мерзімімен салыстырғанда көрсеткіш деңгейінің айтарлықтай жақсарып, 104% асып жығылғанын аңдатады. Әлбетте, мұндай жағдайда локомотив паркін пайдалану көрсеткіштерінің, яғни локомотив өнімділігі, локомотив жүрісі, пойыздардың техникалық және телімдік қозғалыс жылдамдықтарының орындалып, жақсара түсері анық. Бөлімше ұжымы жылдың соңына дейін осы мақсат-міндеттерді бағындыруға күш салмақ. Осыған орай әрбір басшы мен бөлім бастықтарына нақты тапсырма беріліп отыр.

Келесі бір маңызды мәселе, пойыздар тартымына кететін отын-энергетикалық ресурстарды үнемдеп және өлшегішке нақты норманы төмендету болса, бұл бағытта да ауыз толтырып айтарлық жетістік бар. Биылғы жылды бөлімше 300 тоннадан астам дизель отынын үнемдеумен аяқтап отыр. Сондай-ақ, Компанияның кірісін арттыру мәселесі бойынша да Ақмола ЖТ бөлімшесінің ұжымы барлық межелі шараларды орындап, тіпті алдағы жыл еншісіне бағытталған жаңа іс-шараларды да жоспарлап қойған.

Жиынды қорытындылаған бөлімше директоры пойыздардың қозғалыс қауіпсіздігін қамтамасыз ету және теміржолшылардың еңбегін қорғау күн тәртібіндегі басты мәселе болып қала беретінін атап өтті. «2021 жылы еліміздің Тәуелсіздік алғанына 30 жыл толады. Осы айтулы жылда ақмолалық теміржолшылар ел экономикасына сүбелі үлес қосып және Компания мәртебесін арттыру жолында аянбай еңбек етеді деп сенемін», – деп түйіндеді сөзін Айнабек Жұқашев. 

подписка на казахском