Шымкентте болған апат: теміржолжылар жұмыстарын қалай жасады

Жансая Сыдыкбаева

Жансая Сыдыкбаева

Жуырда, 24 қазан күні Шымкентте 13 вагон жолдан шығып кетіп апат орын алған. Оқиғадан зардап шеккендер мен адам өлімі болған жоқ. Салдарынан 5 жолаушы, 10 жүк пойызы тоқтап, қыруар материалдық шығын келді. 

Оқиға орнына бірінші болып Шымкент станциясындағы №39 қалпына келтіру пойызы келіп жетті.

Регламент бойынша вагон құтқарушылар 40 минутта жетуі тиіс. Құрамында 14 адам бар қалпына келтіру пойызының жұмысшылары түнгі сағат 2-де шығып, екінші жолмен оқиға болған жерге 2.20-да келіп жеткен. Шапшаң қимылдап, ЕДК-500/1 кранын орнатып, сағат 2:45-те тақ жолдағы шашылып жатқан вагондарды жинауға кірісіп кеткен қалпына келтіру пойызының құтқарушылары түні бойы тынымсыз жұмыс істеп, апатқа ұшыраған 7-8 вагонды көтеріп, қосымша жолдарға орналастырды. 

Таң атқан соң ЕДК-500 кранымен 4-ші жолда жұмыс басталды. Түскі сағат 13.00-ге дейін 1-ші жолдағы пойыздардың қозғалысы қалпына келтірілді. Бұл кезде ЕДК-300 кранымен 2-ші жолда жұмыс әлі де жалғасып жатты. Сағат түскі 12-де ЕДК-500 кранымен апаттан бүлінген жартылай вагондарды жөндеуге артып жатты. Он платформа қайтадан жолға қойылған соң 7-ші жолмен келіп, оған контейнерлерді орнатты. 

– Вагондар аударылып қалған жердің қашықтығы бізден 800 метрдей алыс. Негізгі жұмыстарды 24 қазан күні істедік. Түнгі сағат 1.40-та бұйрықты қабылдадық. 2.20-да апат орнында болып, таң атқанша жұмыс істедік. Біздің ең бірінші мақсатымыз жолды ашу болды. Жолда қауіпсіздікке кедергі келтіріп жатқан вагондарды екі жаққа кранмен алып тастадық. Ал 25-26 қазанда қайтадан тастаған вагондарды жинап, басқа вагондарға артып, деполарға жөндеу үшін жібердік, қысқасы, бұл біздің жігіттерге де, техникамыз үшін де үлкен сын болған соң аянып қалмадық, – дейді ВП-39 аға шебері Даниер Махаметов. 

Басшылық теміржолдың «жедел жәрдемінің» регламентке сай, сауатты қимылдап, кәсіби жұмыс үлгісін көрсете отырып, өз міндеттерін жоғары деңгейде атқарғанын атап өтіп, бүкіл құрамға алғыс айтты. 

подписка на казахском