Өзен станциясында өндіріске кедергі жоқ

Шахида Жуманова

Шахида Жуманова

Қайта қарантин шаралары енгізіле бастағалы COVID-19 инфекциясының алдын алу мақсатында Маңғыстаудағы Өзен станциясында да қажетті сақтық жұмыстары жүргізілуде. Бүгінде жұмысшылардың бірқатары қашықтан жұмыс тәртібіне көшірілген. Өндірісте жүргендері қажетті «антивирустық» құралдармен толық қамтылған. 

− Барлығымызға белгілі, қазір COVID-19 індетіне байланысты мекемелер қашықтан жұмыс істей бастады. Бізде де Маңғыстау жүк тасымалы бөлімшесі директорының 13.10.2020 жылы шыққан №295 бұйрығына сәйкес 13-25 қыркүйек аралығында әкімшілік менеджер персоналдарын және басшылық құрамдарды 80% пайызға дейін азайтып, жұмысқа зиян келтірмей жұмыс жасауға бұйрық шығарды. 

Осыған байланысты қазіргі таңда станциядағы кейбір мамандар қашықтан жұмыс істеуде. Ең бастысы, өндіріске еш кедергі жоқ. Барлық қызметкерлер маска, антисептик және қолғаптармен қамтылған. 

Техникалық сабақтар өтілмей, қызметкерлер өзінөзі оқыту тәсіліне көшкен. Станция басшылары күнделікті таңертеңгі, кешкі жоспарлы жиналыстарда қызметкерлердің денсаулығын, медициналық тексеруден өткендігін және көңіл күйін қадағалап отырады.

Ауырып тұрған немесе сондай күдікті адам болса, дереу жұмыстан босатылып, медициналық тексеруге жіберіледі. Әзірге, шүкір, станция жұмысшылары індеттен аман, – деп елдегі қазіргі өзекті болып тұрған пандемияға қатысты станциялықтардың бүгінгі жағдайынан ақпарат берген Өзен станциясы бастығының орынбасары Самал Зұлпыхаров өткен тоғыз айды табысты қорытындылағандарын да жеткізді. 

 Өткен үш тоқсанда Өзен станциясынан 1396 вагон, 83760 тонна жүк тиелген. Олар – газ, бензин, қара темір, құрал-жабдықтар, жылыту майлары, тағы басқалар. Ал түсірілген жүк 2597 вагон, 155820 тоннаны құраған. Басым бөлігі түрлі азық-түліктер, ұн, кебек, қарбыз-қауын, ағаш, ауыз су сияқты өнімдер болған. Сондай-ақ, станция үстінен Түркімен еліне транзиттік 738 пойыз, ал 31734 вагон Болашақ станциясы арқылы өткен. 

Станцияда күзгі тексеріс барысында анықталған кемшіліктер толық жойылып, ретке келтірілген. 

Өзендегі күзгі комиссиялық байқау 22-23 қыркүйек аралығында өтіп, қазіргі жағдайға байланысты ол да көп адамсыз, тек жауапты басшылармен ғана жүргізілді. 

− Күзгі байқау барысында, әрине, аз болса да кемшілік табылды және сол тексерістің қорытындысы бойынша олқылықтардың орнын толтыру, кемшіліктерді жою үшін тиісті шаралар қабылданды. Кездескен кемшіліктердің ішінде қауіпсіздікке нұқсан келтіретіндей аса қауіпті жағдайлар болған жоқ. Ал былтырғы байқау қорытындысымен салыстырғанда нәтиже жақсы. 2019 жылы оннан астам кемшілік кездессе, осы жылы төртеу болды және оның барлығы да жеңіл түрдегі кемшіліктер, – дейді станция бастығының орынбасары. 

 Сонымен қатар қозғалыс қауіпсіздігі шаралары бойынша «Қазақстан темір жолы» ҰК» АҚ Қозғалыс қауіпсіздігі қызметінің басшысы М.Шакеновтің төрағалығымен Өзен станциясында қыркүйек айының тоғызында жоспарлы тексеру өткен еді. Онда бірнеше кемшілік анықталып, бүгінде соған қатысты тиісті қызметкерлер жауапқа тартылған және қажетті шаралар жоспары жасалған.