Сайрам – Шымкенттің іргесіндегі, оңтүстіктің шырайлы тұсында орналасқан шағын станция, небәрі 8 теміржолшы еңбек етеді. Сексен жылға жуық тарихы бар аядай ұжым қозғалыс қауіпсіздігін мүлтіксіз қамтамасыз етіп, теміржол тасымалына өз үлесін қосып келеді.
Станцияда төрт жол бар, басты жол, тұйыққа қабылдау-жөнелту жолы, вагондардың қауіпсіздігін қамтамасыз етіп жөнелту жолы. Станция басшысы Марат Арапханның айтуынша, жолдар жөндеуден өткізілген, ПЧ-53 жұмысшылары қалпына келтіру жұмыстарын уақытылы орындауда. ШЧ тарапынан станция паркінде 2 жоғары вольтті шам орнатылыпты. Біреуі станция алдында болса, екіншісі парктің ортасында орналасқан. Жарықтандыру мәселесіне шағым жоқ екен.
Сайрам станциясынан көбіне құрылыс шикізаттары, яғни өңделмеген және дайын заттар, мұнай өнімдері – дизельді жанармай, бензин және бидай түсіріледі. Бұдан басқа, бидай өнімдері, ұн, дайын құрылыс заттары мен темір тиеліп, жөнелтіледі.
Станция жолынан екі жақтан да жұп және тақ пойыздарды қабылдау мүмкіншілігі бар. Бірден 40 вагонға дейін қабылдай алады. Айына вагон айналымы шамамен 265 вагонды құрайды, 250 вагон жүк түсірілсе, 15 вагон жүк тиеледі. Сондай-ақ, Сайрамда вагондар тарқатылғанымен, сұрыпталмайды екен. Станция толығымен ККЖ АБЖ (АСУ ДКР) жүйесіне қосылған. Қағазсыз технология мұнда да жұмыс жасап тұр.
– Жыл басынан бері станцияда атқарылған жұмыстар аз емес, станция ғимаратының шатырын толығымен ауыстырып, аумағын қоршап көгалдандырдық. Станцияға тиісті аймақтарда апта сайын қоқыстар тазартылып, қыста қардан, көктем мен жазда ай сайын шөбін орып отырамыз. Жылына екі рет косметикалық жөндеу жұмысын жүргізіп, керекті жерлерін сырлап, әктеп отырамыз. Өткен жылы дәлізге кафель төсеп, 2 кабинеттің едені жаңартылған болатын. Қысқасы, менімен қосқанда 4 станция кезекшісі, 1 тауар кассирі, 2 жүк қабылдаушы болса да теміржолшыларға жұмыс істеуге жайлы жағдай жасалған. Ал карантин уақытында станция Түркістан облысының бас дәрігері шығарған үкімге тиісті жұмыс жасадық.
Яғни күніне мекемені екі мезгіл хлормен тазалап, ескерту мен қауіптің алдын алу туралы ережелерді көрнекілендіріп, тиісті жерлерге іліп қойдық. Одан бөлек дезинфекция құралдары орнатылды. Арақашықты сақтай отырып күнделікті жұмысымызды үзбей жалғастырдық, – дейді станция басшысы Марат Арапхан.
Станцияда еңбек қорғау жағдайы толығымен сақталған. Әрбір жұмысшыға кестемен сәйкес маусымдық киімдер беріліп отырады. Жол апаты мен мал қағу фактілері орын алмаған.
