COVID-19: екінші толқынға дайынбыз ба?

Әлемді шарпыған коронавирус індеті адамзат баласын тазалыққа, тәртіпке үйретті. Бұрынғыдай емес, әр мемлекет шекарасын қымтап, басқа елдермен байланысын қысқарта бастады. Себебі, Дүниежүзілік денсаулық сақтау ұйымы індеттің екінші толқынына дайындықты күшейтіп, сақтық шараларын қолға алуды пысықтауда.

Біз Алматы қаласын республиканың түкпіртүкпірімен байланыстырып тұрған екі теміржол вокзалының індеттің екінші толқынына дайындығын көріп қайттық. Алматы-2 вокзалында әншейінде ығы-жығы, азан-қазан болып жататын жолаушы нөпірі жоқ. Вокзалдың сырты да, іші де жым-жырт. Бірен-саран жолаушы ғана билет алып, пойыз күтіп отыр. Бүгінде халық та бұрынғыдай емес, аса қажетті шаруа болмаса, мейлінше үйден шықпауға үйренгені байқалады. 

Ал Алматы-2 вокзалы сақтық шараларын екі есе күшейтіпті. Кіреберіске «Бетпердесіз кіруге болмайды!» деген үлкен плакат ілінген. Онда ҚР ӘҚБКо-нің 425-бабына сәйкес, талапты бұзғаны үшін жеке тұлғаларға – 30 АЕК (83340 теңге), заңды тұлғаларға – 230-дан 1600 АЕК (638 940-4 444 800 теңге) айыппұл төлейтіні тайға таңба басқандай жазулы тұр. Бұдан бөлек арақашықтықты сақтауды қатаң ескерткен. 

Вокзалдың маңдайшасына санитарлықкарантиндік талаптарға орай жолаушылардың вокзалдағы жүру ережесі де ілінген. «Үйден жолға шықпас бұрын температураңызды өлшеңіз. Егер қызуыңыз көтерілсе, тәуекелге бармай, үйде қалғаныңыз жөн. Билет құны жолаушылар тасымалдау ережесіне сәйкес қайтарылады. Сондай-ақ, вокзал ғимаратына маскасыз ешкім кірмейді және бір метр арақашықтық қатаң сақталуы тиіс» делінген. 

Алыс сапарға шыққан жолаушы осы жаднамаға көз жүгіртіп шықса, артықтық етпесі анық. 

Кіреберісте жолаушылардың қызуын тексеріп өткізіп жатыр. Санитайзер вокзал кіреберісіне де, ішіне де орнатылған. Одан бөлек арақашықтық сақтау үшін еденде арнайы белгілер көрсетілген. Күту залындағы орындықтар да сондай. Жолаушының бір-біріне жақын отырмауы, билет алар кезде қашықтық сақтауы қамтамасыз етілген. 

 Алматы-1 теміржол вокзалында да тура осы көрініс. Мұнда жолаушылардың қарасы көптеу көрінді. Бірақ бәрі де сақтық шараларын қатаң ұстануға дағдыланып қалғаны қуантты. 

«Қазір вокзалдың кіреберісіне антисептик кілемшесі қойылды. Вокзал ғимаратына бетпердесіз адамның кіруіне қатаң тыйым салынған. 

Сондай-ақ, дезинфекция шарасын да қатаң жүргізу жолға қойылды. Әр 2 сағаттан кейін еден жуылады, есік тұтқалары антисептикпен сүртіледі. Вокзалдың тазалығына, дезинфекция жүргізу жұмысына арнайы фирма жауапты.

Біз олармен келісім-шарт жасадық. Олар бұл жұмысты ойдағыдай атқарып келеді. Тағы бір айта кетерлігі, бүгінде жолаушылар саны да екі есе азайған.Бір сөзбен айтқанда, Алматы қаласының тоғыз жол торабын байланыстырып тұрған екі теміржол вокзалы қала бас санитар дәрігері Ж.Бекшиннің талабы мен нұсқауын орындап отыр» деп жауап берді оңтүстік астанадағы екі вокзал ғимаратының күтіміне жауапты «Алматыэлектротранс» ЖШС баспасөз қызметі. 

Бұл індет ғасырда бір қайталанады екен.

Осыдан жүз жыл бұрын әлем халқын тұмау эпидемиясы қынадай қырғаны белгілі. Міне, сол 1918-19 жылдары АҚШ-та маска тақпаған адамдарды полиция ұстап шара қолданатын болған. Бұл талап пен тәртіп бізге де келді. Қазір әр адам өз өміріне, денсаулығына жауапты кезең. Сондықтан сақтық шарасының бір парасы – маска тағу әр адамның күнделікті өмір салтына айналуы ғажап емес.