Жаңа вагондар рейске шығуға дайын

Сулугуль Бакесова

Сулугуль Бакесова

«Жолаушылар тасымалы» АҚ «Нұрлы жол» инфрақұрылымдық дамудың мемлекеттік бағдарламасын жүзеге асыру шеңберінде вагон паркін жаңарту жұмыстарын жалғастыруда. Елде төтенше жағдайлар мен шектеулер алынып тасталғаннан кейін «Тұлпар» Вагонқұрастыру зауыты» ЖШС өндірісінен шыққан су жаңа 18 вагон өзінің алғашқы сапарына аттанбақ.

Бұл вагондардың негізгі артықшылығы – ауаны зарарсыздандыру және тазалау үшін қазіргі заманғы сүзгілермен жабдықталған кондиционерлеу жүйесі бар. Ал бұрынғы плацкарт вагондарында ауаны кондиционерлеу жүйесі болмаған еді. Әр вагонда 6 видеокамера орналасқан. Олар бейнені түрлітүсті және ақ-қара режимінде түсіреді. Барлық таспа штабтық вагондағы пойыз басшысының қадағалауында болады. Әрбір купеде және дәліздерде кернеуі 220В болатын электр розеткалары және ұялы телефондарды зарядтауға арналған 2 заманауи USB порттары орнатылған. Бұдан бөлек тоңазытқыш, қысқатолқынды пеш, ауыз су диспенсері және ыстық су титаны бар.

Вагондар түтін датчиктерімен, меншікті өрт шлангымен және әрбір вагондағы су қорымен қазіргі заманғы өрт сөндіру жүйесімен жабдықталған. Сонымен бірге байланыс, диагностика және басқару жүйелері қарастырылған. Әжетханалар кешені енді автономды түрде жұмыс істейді және суды зарарсыздандыруға арналған резервуарлардағы 1200 литр сумен жабдықталған. Қызмет ету мерзімі 40 жылды құрайтын жаңа вагондардың жолдағы жоғары қозғалыс жылдамдығы 160 км/ сағат. Атап өтерлігі, бұл осыған дейін аталған өндіріс орнынан осыған дейін шығарылып келген бұрынғы испандық Тальго вагондарынан әлдеқайда ыңғайлы. Ресейлік Тверь вагон зауытының технологиясы бойынша отандық «Тұлпар» зауытында құрастырылып шыққан кең шанақты бұл вагондар батыс бағытында жолаушылар тасымалы қызметіне жұмылдырылатын болады.

Еске сала кетсек, өткен жылы да ұлттық тасымалдаушы компания вагон паркін жүзге жуық жаңа вагондармен жаңартып, олар оңтүстік-батыс бағыттары бойынша жолаушыларды тасымалдай бастаған еді. Жаңа вагондардың кезекті бір тұсаукесерінде «Жолаушылар тасымалы» АҚ басшылығы: «Жыл сайын біз өзіміздің вагон паркімізді жаңа 100 вагонмен толықтырып отырамыз. Басты мақсатымыз – жолаушыларға барлық жағдай жасап, сервис сапасын жоғарылату» - деп атап өткен болатын. Таяу он жылда жолаушылар вагон паркін бес жүзге жуық жаңа құраммен толықтыру жоспарланған. Басшылық сөзінің нақты іспен ұштасып жатқанына сәт-сапарын күтіп тұрған осы вагондар дәлел болмақ.