Қалауын тапса қар жанар

Астана станциясының жанындағы Қырқыншы станциясының халқы жылдан жылға артып жатыр. Оның сыры да белгілі, станция қала іргесінде. Бірақ, тек жүк станциясы ретінде қызмет етіп келген станцияда не вокзал, не күту ғимараты жоқ.   

Станция бастығы Дастан Онбеспаевтың айтуынша, бүгінде Қырқыншы станциясынан Ерейментау-Көкшетау бағытына және кері бағытта жүретін электр пойызы және тағы бірнеше пойыз тоқтап, жолаушылар мініп-түседі. Вокзал болмағандықтан сол пойыздарға мінетін жолаушылар, әсіресе қыстың аязды да боранды күндері станцияның әкімшілік ғимаратын паналап, жиналып қалатын болған. Ал бұл ғимараттың бірінші қабатында тауар кассирлері отыратындықтан, жиналған халық олардың жүк жөнелтушілермен қатысты жұмысына кедергі келтіретіні айдан анық. Қыстың көзі қырауда оларды далаға шығарып жіберудің жөнін таппай, қалдырып қоюдың тағы ретін таппай, теміржолшылар бөлек күту залын ашу туралы шешім қабылдапты. Оңан бір тиын да қаржы жұмсамаған, шаруашылық тәсілімен, яғни өз күштерімен күту залын салып, көпшіліктің алғысына ие болыпты.

– Алдымен контейнер тауып, соны өз күшімізбен күту залы етіп жасап шықтық. Есік ашып, ішіне орындықтар қойып, жылытып дегендей. Қазір пойызға мінетін жолаушылар сонда отырады, бізге де, оларға да жақсы болды, бір-бірімізге кедергі келтірмейміз. Жұмысымыз жеңілдеп, халық та бізге алғысын жаудыруда. Осы игілікті іске мұрындық болып, жүзеге асыруға атсалысқандар қатарында станция бастығының шұғыл жұмыстар жөніндегі орынбасары Қайрат Құрманбаев пен логистика жөніндегі орынбасары Нұрлан Лесов және техникалық жұмыстар бойынша орынбасар Нәдірхан Қайсаров болғанын мақанышпен айтар едім, – дейді әріптестерінің бастамасына қолдау білдірген станция бастығы.  

Сырты контейнер демесең, іші заман талабына сай жабдықталған күту залы расымен ұядай жылы, жып-жинақы екен. Жарықтандырылып, жылу жүргізілген. Қатты суықтың өзінде ішінің температурасы +12,+15 градус болып тұрады. Ол үшін 4 жылыту құралы қойылған. Сыртқы есігі де мықты етіп қымталып, суық өткізбейтіндей жасалған. Ішіне темір орындықтар қойылған. Барлық қауіпсіздік талаптары сақталған. Сонымен қатар пойыздардың келе жатқанын естіп отыру үшін ішінде дауыс зорайтқыш та бар екен. Күту залы пойыз жүретін кесте уақытына қарай ашық болады. Оның кестесін станция ұжымы 4.00-7.00-ге дейін және 19.00-ден 21.00-ге дейін деп реттестірген.  

Райхан РАХМЕТОВА 

Суретті түсірген автор